ԱՊՐԻԼԵԱՆ ԵՐԳԵՐ Ապրիլը` պատրաստեց ՀԱՄԲԻԿ ՄԱՐՏԻՐՈՍԵԱՆ

ԱՊՐԻԼԵԱՆ ԵՐԳԵՐ Ապրիլը` պատրաստեց ՀԱՄԲԻԿ ՄԱՐՏԻՐՈՍԵԱՆ



Խաչուած է իմ հոգին։ Վաղո՜ւց

Քարանձաւներու մէջ չղջիկներ կը պարեն

Ամայութիւնը կոռնայ չորս դիս

Անո՞ւնը այս տխուր խաղին՝

Գա՜ղթ է ջա՜րդ Եղեռն սոսկալի։



Գետ ու լճակ արեան ծով են հիմա

Ձուկերը կարմիր են հագած լո՜ւրթ

Արիւն կը ծծէ հողը ծարաւէն,

Երկինքը կայրի կը շիկնի ամօթէն

Գարուն է անունն այս եղանակին։ Ապրի՜լ։



Ծառերը ցամքեր են։ Անտէ՜ր են

Անձրեւը դարձած է մեղքի կարկուտ արցո՜ւնք

Պարտիզպանը կախուած է իր սիրած ծառէն

Չարիք է անունը այս բեմադրութեան

Չարագո՞րծն։ Ան կը ժպտի՜ անփոյթ։



Շուրջս մեռելներ են։ Ո՜ղջ ու կը պարե՜ն

Գերեզմանո՜ց է աշխարհն այս համայն

Մարդիկ անտարբեր, գինո՜վ են ցասումէն,

Զայրոյթը կը զարթնի թմբիրէն, զգո՜յշ

Խուլ աշխարհը կը մռնչէ խելագարօրէն։



Մայրեր կու լան լուռ եւ անարցունք

Սերունդներ կը վառեն յոյսի մոմեր

Հոգեհանգիստ է պէտք ապրողներուն համար

Իսկ խունկ ու ծուխէն կը հոտի վրէ՜ժ

Ու դարը կու լայ իր մեղքն ու մեղան։



Շրթունքներուս վրան երգ է եւ աղօ՜թք

Ու աղօթքէս կը վառի կամքս, հրդե՜հ

Ոտքերս տատամսոտ կը կառչին հողին

Սիրտս կուզէ գոռալ խուլ աշխարհին

Ես, ես կը մերժեմ մահը վճռած եմ ապրիլ։